ဩဂုတ် ၄ – ၂၀၂၅
SS (VOM)
စစ်ကိုင်းတိုင်း၊ ကလေးမြို့နယ် (တောင်ပိုင်း) က လက်နက်ကိုင်တပ်တွေ သိမ်းပိုက်ထားတဲ့ ကြန်သာကျေးရွာကို ပြန်လည် ထိန်းချုပ်နိုင်ဖို့ နလအ တပ်တွေက မနေ့ ဩဂုတ် ၃ ရက်နေ့ကစပြီး ထိုးစစ်ဆင် တိုက်ခိုက်လာတဲ့အတွက် တိုက်ပွဲ ပြင်းထန်နေတယ်လို့ စစ်ရေး သတင်းရင်းမြစ်တွေက ပြောပါတယ်။
နလအတပ်တွေဟာ မကွေးတိုင်း၊ ဂန့်ဂေါလမ်းပိုင်းပေါ်ရှိ ဟံသာဝတီကျေးရွာ၊ ပြည်သူ့စစ်စခန်းကနေ နယ်မြေချင်း ထိစပ်နေတဲ့ စစ်ကိုင်းတိုင်း၊ ကလေးမြို့နယ်ဘက်ကို စစ်ဆင်ရေး လုပ်ဆောင်လာတဲ့အတွက် ကြန်သာကျေးရွာ အနီးမှာ တိုက်ပွဲ ဖြစ်ပွားနေတာလို့ သိရပါတယ်။
“တိုက်ပွဲဖြစ်တာက ကြန်သာရွာအနီး၊ တောင်ဘက်မှာ ဖြစ်နေတာပါ။ နလအတပ်ဘက်ကတော့ သူတို့လက်လွှတ်လိုက်ရတဲ့ စခန်းတွေကို ပြန်ရဖို့ ဟံသာဝတီကျေးရွာ ပြည်သူ့စစ်တွေကို အမာခံထားပြီး စစ်ဆင်ရေး ဖော်ဆောင်နေတာပေါ့။ အခုအချိန်အထိတော့ အဲဒီ စခန်းတွေကို ဒေသတွင်း လက်နက်ကိုင် တပ်တွေက ထိန်းချုပ်ထားတာပါ” လို့ စစ်ရေးသတင်းရင်းမြစ်က ပြောပါတယ်။
မနေ့ ဩဂုတ် ၃ ရက်နေ့ တိုက်ပွဲ ဖြစ်ပွားချိန်မှာ နလအတပ်က ပါရာမော်တာ – စက်တပ်လေထီးကို ပထမဆုံး အကြိမ်အဖြစ် စတင် အသုံးပြုကာ ကလေးနယ် (တောင်ပိုင်း) ကျေးရွာတွေအပေါ် ပျံဝဲခဲ့ပေမယ့် လေကြောင်း တိုက်ခိုက်မှုတော့ မရှိခဲ့ဘူးလို့ ဆိုပါတယ်။
နလအတပ်အနေနဲ့ လက်ရှိ တိုက်ပွဲ ဖော်ဆောင်နေတဲ့ ကြန်သာရွာကို ပြန်လည် ရယူနိုင်ဖို့အတွက် ပြီးခဲ့တဲ့ လတွေကတည်းက အကြိမ်ကြိမ် ထိုးစစ်ဆင် တိုက်ခိုက်နေခြင်း ဖြစ်တယ်လို့ သိရပါတယ်။
ဒေသတွင်း လက်နက်ကိုင် ပူးပေါင်းတပ်တွေဟာ ကလေး – ဂန့်ဂေါလမ်းပိုင်း စိုးမိုးနိုင်ရေးအတွက် ပြီးခဲ့တဲ့ ဖေဖော်ဝါရီလကနေ ဧပြီလအထိ စစ်ဆင်ရေး နှစ်လတာ ပြုလုပ်ခဲ့တာဖြစ်တယ်လို့ သိရပါတယ်။
အဲဒီနောက် ကလေးမြို့နယ် တောင်ပိုင်းက နစကရဲ့ ကမ်းပါးနီစစ်စခန်းနဲ့ ကြန်သာရွာ စစ်စခန်းအပါအဝင် စစ်တပ်စခန်း ငါးခုကို သိမ်းပိုက်နိုင်ခဲ့တယ်လို့ သိရပါတယ်။
ဒါအပြင် စစ်ကိုင်းတိုင်းအတွင်းက ပုလဲမြို့နယ်ရှိ ကန်ဒေါင့်ရဲစခန်းမှာလည်း ဩဂုတ် ၁ ရက်နေ့မှ စတင်ကာ တိုက်ပွဲတွေ ပြင်းထန်လျက်ရှိတယ်လို့ သိရပါတယ်။
နလအ စစ်ရေးသတင်းရင်းမြစ်တွေရဲ့ အသိပေး ဖော်ပြချက်မှာ ပုလဲမြို့၊ ကန့်ဒေါင့် ရဲစခန်းကို ဩဂုတ် ၁ ရက်နေ့၊ ညပိုင်းမှာ နလအတပ်က ပြန်လည် သိမ်းပိုက်ထားနိုင်ပြီ ဖြစ်တယ်လို့ ရေးသားထားတာတွေ့ရပါတယ်။
ဒေသတွင်း လက်နက်ကိုင် တပ်တွေဘက်ကတော့ ဒါဟာ သတင်းမှားသာ ဖြစ်တယ်လို့ တုံ့ပြန်ထားပြီး ကန်ဒေါင့်ရဲစခန်း ပတ်ပတ်လည်မှာ လက်နက်ကိုင်တပ်တွေ ဝိုင်းရံ ပိတ်ဆို့ထားတဲ့အတွက် နလအတပ်တွေ ရှေ့တိုးမရဘဲ လက်ရှိအချိန်အထိ တိုက်ပွဲ ဖြစ်ပွားနေဆဲ ဖြစ်တယ်လို့ ဆိုပါတယ်။
ဒါအပြင် စစ်ကိုင်းတိုင်း၊ ကလေးမြို့နဲ့ နယ်မြေချင်း ထိစပ်လျက်ရှိတဲ့ မကွေးတိုင်း၊ ဂန့်ဂေါမြို့နယ်မှာလည်း ဒီကနေ့ သြဂုတ် ၄ ရက်၊ မနက်အစောပိုင်းက နလအတပ်တွေ နယ်မြေရှင်းလင်းရေး လုပ်ဆောင်မှု ရှိခဲ့တယ်လို့ သိရပါတယ်။
အဆိုပါ စစ်ကြောင်းဟာ ဂန့်ဂေါမြို့၊ ရှောက်ပင်ရွာမှာ ဘန်ကာတွေ ဆောက်လုပ်ကာ ကင်းချထားတဲ့ နလအတပ်တွေနဲ့ ဒီကနေ့ မနက် ၃ နာရီဝန်းကျင်က ပူးပေါင်းခဲ့ပြီး အနောက်ဂန့်ဂေါရွာနဲ့ ရှုံးရှီကျေးရွာတွေကို ဝင်ရောက်ခဲ့တယ်လို့ သိရပါတယ်။
အဲဒီနောက် အဆိုပါ ကျေးရွာတွေက ဒေသခံ ၁၂ ယောက်ကို ဖမ်းဆီး ခေါ်ဆောင်ပြီး မနက် ၆ နာရီခွဲဝန်းကျင်မှာ စစ်ကြောင်း နှစ်ကြောင်းခွဲကာ ပြန်လည်ဆုတ်ခွာသွားခဲ့တယ်လို့ ဒေသတွင်း လက်နက်ကိုင်တပ်တွေက သတင်းထုတ်ပြန်ထားပေမယ့် နလအဘက်ကတော့ ဒီဖြစ်စဉ်နဲ့ ပတ်သက်လို့ လက်ရှိ အချိန်အထိ တုံ့ပြန် ပြောဆိုထားခြင်း မရှိသေးပါဘူး။
“ဖမ်းတာကတော့ ဘာအတွက် ဖမ်းတယ်ဆိုတာ အခုထိ သေသေချာချာ မသိရသေးဘူး။ ဘယ်ကို ခေါ်ဆောင်သွားတယ် ဆိုတာလည်း စုံစမ်းလို့ မရသေးဘူး။ သူတို့ ဝင်မလာခင် ဖုန်းလိုင်းတွေ၊ အင်တာနက်လိုင်းတွေကို လိုင်းအတက်နှေးအောင် လုပ်ထားတော့ ဖုန်းတွေလည်း လိုင်းမိပေမယ့် ခေါ်လို့မရဘူး။ အဲဒါကြောင့် သူတို့ ရောက်လာမယ့်အကြောင်း တရွာကတရွာ ဖုန်းဆက်လို့ မရတော့ မသိလိုက်ကြဘူး။ ခုနောက်ပိုင်းက နလအဘက်က နယ်မြေရှင်းလင်းရေး လုပ်တာ ပိုစိပ်လာတယ်” လို့ သတင်းရင်းမြစ် တယောက်က ပြောပါတယ်။
ဒီဖြစ်စဉ်နဲ့ ပတ်သက်လို့ ဒေသတွင်း လက်နက်ကိုင်တပ်တွေရဲ့ ဆက်လက် အသိပေး ဖော်ပြချက်မှာတော့ အဆိုပါ စစ်ကြောင်းတွေထဲက စစ်ကြောင်း တကြောင်းဟာ ယခင်အထိုင်ချ နေထိုင်လျက်ရှိတဲ့ ရှောက်ပင်ကျေးရွာကို ပြန်လည် ဆုတ်ခွာသွားတယ်လို့ ဆိုပါတယ်။
နောက်ထပ် စစ်ကြောင်းတကြောင်းကတော့ We Love GanGaw တံတားထိပ်အထိ အကြိုလွှတ်လိုက်တဲ့ ကား သုံးစီးနဲ့ လိုက်ပါသွားကာ ဖမ်းဆီးလာတဲ့ ဒေသခံ ၁၂ ယောက်အနက် အမျိုးသမီး နှစ်ယောက်ကို တံတားထိပ်မှာ ပြန်လည် လွှတ်ပေးခဲ့တယ်လို့ ဒေသတွင်း လက်နက်ကိုင် တပ်ဖွဲ့တွေရဲ့ အသိပေးချက်မှာ ဖော်ပြထားပါတယ်။
လက်ရှိမှာ နလအတပ်ဟာ ဂန့်ဂေါမြို့ပေါ် ရပ်ကွက် လေးရပ်ကွက်အပြင် ရှောက်ပင် (အောင်မြင်)၊ မြောက်ခင်ရန်း၊ ဟံသာ၀တီနဲ့ ကျေးရွာတချို့ကို ထိန်းချုပ်ထားနိုင်တာ ဖြစ်တယ်လို့ သိရပါတယ်။
Photo – CJ